شوية أفكار لازم تعرفوها في المطبخ
--- تعالوا يا بنات اعرفكوا علي شويه أفكار لازم تعرفوها وانتوا بتطبخوا ....
- عصير البطيخ بالنعناع منعش في الجو ده بس مش بيتحط عليه مياه عبارة عن بطيخ وثلج ونعناع بس 
- معلقه صغيره كركم مطحون على الدقيق بتاع السمك المقلي بيخلي لونه تحفه.
- نص معلقه صغيره سكر علي السلطة البلدي بتاعتنا بتخليها زي بتاع المحلات .
- لو السمك المقلي بيشرب زيت يبقا بعد ما نغطيه بالدقيق نزليه فطبق غويط فيه مياه وبعديها ع الزيت هيفضل مقرمش لتاني يوم
- لما لون الحله الالومنيوم يسود اطحني قطعه من الفحم وادعكيها بالسلك مع نقطه صابون ترجع جديده .
- لما تيجي تطبخي الفاصوليا او اللوبيا الجافة تنقع قبلهم بليله ومش هتاخد معاكي وقت ف السوا .
- احتفظي بالقشطة اللي بتكون علي وش اللبن المغلي وتعملي منها احلي زبده بلدي ونضيفه .
- -للتخلص من الدهون العالقة بالسيراميك او الارضية او الحائط ضعي القليل من الخل واتركيه لمده نصف ساعة وبعد ذلك ادعكي الدهون بسلك مواعين سوف تدهشك النتيجة .
-الميه اللي بنسلق فيها العدس بتاع الكشري مبنرميهاش بنسقي بيها الأرز بتاع الكشري .
- طشه الملوخيه عشان تعمل صوت عالي يبقا لازم تكون الزبده بتاعتها كتيره وده السر اصلا .
- صلصه الطماطم عشان تتسبك صح وتنزل الدهون اللي فيها يبقا تحطي معاها معلقه صغيره ملح .
- البتنجان لو بيشرب زيت رشي عليه ملح وحطيه فمصفاه ينزل الميه اللي فيه أو تقطعيه رفيع مستحيل يشرب زيت .
- جربي متحمريش التوم اوي وانتي بتطبخي خليه لونه يبيض بس ويطلع .
- قبل ما تطبخي الخضار شوحيه مع البصله بملح وفلفل وبعدين نزلي الطماطم وكبشتين شوربه هتدوقي أحلي والذ طبيخ .
فريق// أوه لايف
