- نصائح للمصيفين ****
- محدش ياخد معاه حذاء رياضى ولا جلد كله بلاستيك واهم حاجه شوز بحر او صندل اوعى تنزل البحر حافى فيه ناس بترمى زجاج و مواد صلبه ده غير الصخور ..
- لازم تاخد كلاميل من الصيدليه لحروق الشمس .
- حط فى شنطتك ملايه و بشكير هتحتاجهم جدا .
- متشيلش فلوس كاش كتير على اد مصاريفك و لما تحتاج روح اسحب تانى لانك هتفرتك اى فلوس فى جيبك .
- اعمل دايما مساحه لحريتك و بلاش تضايق حد او تتطفل على حد اتقى الله .
- الفصال اهم مبدء فى المصايف ....
- متاخدش اى حاجه مهمه معاك .. مفيش اى داعى للذهب معاك لانه اما هيضيع او هيتسرق.
- اتعود تركب مواصلات عامه علشان توفر و نصف فلوسك متروحش فى المواصلات .
- لما تحجز شقه متبعتش عربون كبير اى مبلغ بسيط علشان لو اتنصب عليك متزعلش اوى .. و حاول تأجر من حد ثقه حتى لو تدفع ازيد شويه .
- اهم حاجه باه معاك طبة كالون للباب و مفك علشان اول متسكن تغير القلب فورا علشان تخرج و انت مطمن و تنام فى امان ....
- احجز مواصلاتك قبل اسبوع من سفرك لو مسافر باص .
- خد معاك جاكت خريفى حتى و انت فى عز الصيف علشان تكييف الباص و تقلبات الجو .
- متسافرش مع عدد كبير لانك مش هتنبسط ووقتك هيضيع فى اللى نايم و اللى مش عايز و اللى ملهوش مزاج و اللى و اللى .....
- خد معاك هاند فرى و كتاب ....
- اى حاجه تضايقك تناساها انت هتصرف فلوس كتير علشان تصيف فلازم تضحك على اى حاجه حتى لو نكد . بلاش تمنع عيالك فى الفتره دى من اى شىء فرحهم فى حدود امكانياتك و متبخلش عليهم و لا على زوجتك عاملهم على انهم اصحابك بلاااااااش اوامر خليك فرفوش .....
- الشباب اللى بيسافروا مع بعض خليك محترم و متعاكس حد و بلاش استظراف لانك ممكن تضرب او تتحبس حريتك لها حدود . و فيه حاجه اسمها شرطه السياحه هتديك بالقفا فخليك مهذب .
مصيف سعيد على الجميع ،،،،،
فريق// أوه لايف
