-- أنواع واستخدامات المانجا....
-- أنواع واستخدامات المانجا....
طبعاً كلنا بنحب المانجا، وهي متوفر السنة دي كتير جداً ، وأسعارها تعتبر مناسبة للجميع، المانجا بناكلها، وبنشربها عصير، وكمان بقت بتدخل في عمل الحلويات، ولكن لها استخدامات أخري عديدة، نقوم بذكرها في هذا التقرير ،،،،
- مانجا الأكل اللي هى هناكلها النهاردة وبكرة نشتري عويس وسكري، ودول اكتر صنفين مميزين .
- العويس بتنفع تفضل في التلاجة لحد اسبوع مش بيجرالها حاجة .
- السكري نفسها قصير يومين تلاتة وتطرى وتفتح من جنابها هنا ممكن تخليها وتعمليها عصير او تفرزيها .
- مانجا العصير ، يعني اللي هندخلها المطبخ نعمل عصير وحلويات وسموزي وكده .
- الكيت والزبدية والفونس والصديقة والتيمور، بيكون فيها كتير طبعا طعمة ومسكرة، وهي مانجا لحمها قوي وبتتحمل تقطيع وتزيين وكده زائد الاكل العادي طبعا .
- عاوزة تبعتي لأصحابك، أو قرايبك برة مصر،اختاري مانجا زبدية او عويس ماتكونش كاملة السوا يعني تكون ناشفة شوية بس مش حجر خلي بالك.
- الناشفة شوية دي تتلف في قماشة قطن او صوف وتترص مرتاحة فى شنطة هتوصل للناس بقيمتها ومش متفعصة ولا متبهدلة.
- عاوزة تخزني المانجا لرمضان او تخليها عندك،كل المانجة تنفع تتخزن وتتفرز عادي حاولي بس وانتي بتخليها تقسميها أكياس وتخلي الكيس مفرود مش مكبب عشان يبقى سهل واعملي رف او مكان مخصص للفاكهة في التلاجة لانها بتكرف من روايح الخضار والتوم ويبقى تعبك راح على الفاضي .
- تعرفي المانجا الحلوة ازي،من ريحتها النفاذة امسكي ثمرة وشميها بالراحة هتلاقي ريحة مانجا قوية اللي مش مستوية بيكون ريحتها غصن شجر مقطوع ريحة مفيهاش عطر الفاكهة .
- جالك مانجا نية، وقالولك متقلقيش هتستوي، ايوه هتستوي حطيها في طبق بلاستيك وغطيها بفوطة وسيبيها في حرارة الغرفة يومين تلاتة وريحتها هتقولك انا استويت .
- عاوزة تعملي عصير مانجا حلو وأولادك يتجننوا عليه .
- اعملي عصير عادي خالص بس خليه تقيل شوية وعلى جنب قطعي ثمرتين كده مكعبات وسقطي المكعبات في قلب العصير وقدمي معاه شوكة وشاليموه .
- اوعي يجيلك مانجة خضرا ولسة مش مستوية وتحطيها في التلاجة هتدبل وتبوظ ومش هتستوي المانجا النية ملهاش لا فريزر ولا تلاجة .
- في مانجا عجيبة كده في السوبر ماركت وعلى العربيات في الشارع اسمها شيلوك مسحوبة كده وطويلة ياريت نقلل منها لان نسبة املاحها عالية جدا .
فريق// أوه لايف
