أوعي تستسلم
- تعرض الأنبياء، لأصعب المواقف، ياريت نتعلم منها، وبلاش استسلام ...
- سيدنا موسي ربنا أمره بإنه يضرب البحر بالعصا في أصعب موقف
- والسيدة مريم برغم إنها كان ربنا بيرزقها وهي في المحراب بدون تعب منها، إلا إنها في أصعب موقف أتقالها
(هزي بجزع النخل ) .
- وكأنها إشارة لازم في سبب وعمل و في أصعب المواقف بالذات العمل بيبقى فرض عليك .
- عشان هتبقى أقوى بيه عشان ربنا عايزك متستسلمش ولا تضعف .
- سيدنا نوح عليه السلام ربنا أمره ببناء السفينة (سفينة النجاة )، ويقال إنه بناها في ٤٠ سنة، وده في ظل الناس المؤذية اللي كانت معاه اللي كانوا بيستهزوا بيه انه بيبني سفينة في الصحراء، وبيأذوه لدرجة إنهم كانوا بيحرقوا الأشجار عشان ميقدرش يكمل، مع أن ربنا قادر في طرفة عين ينزل السفينة علي سيدنا نوح ، لكن ده لحكمة ولعبرة لينا عشان دول قدوتنا في الحياة .
- الحياة اللي عمرها ماكانت سهلة أو بسيطة، ربنا بيرشدنا دايماً في القرآن لسنة الحياة الكبري، وهي العمل والاخذ بالاسباب الممكنة ، وإنك تحاول وتعافر ولما تقع متستسلمش قوم وكمل وشوف الدروس المستفادة لكن اوع تيأس أو تستسلم .
وفي سورة الكهف ربنا بيدينا اشارة حلوة اوي لما قال: (واتيناه من كل شئ سبباً فأتبع سبباً)
- أنت محتاج تتبع كل سبب هيوصلك للي بتتمناه وبتحلم بيه محتاج تخبط علي كل باب، وحقيقي والله لازم يجي من عند ربك المدد والعون وتحقق اللي بتتمناه، مهما ضعفت أرجع أقف وكمل، وأفتكر أن الأحلام الكبيرة بتحتاج خطوات أكبر.
- ومفيش حاجة هتيجي سهلة ، كل الحاجات الكبيرة جت بعد عناء وطريق طويل أوي كله مطبات وساعات منح من ربنا وإنك تقع وتقوم المهم عينك علي اللي بتحلم بيه وحالف لتوصله .
اوعي تستسلم ،،،،،
فريق// أوه لايف
